Bisch derbyy, e Strizzi z’syy?
Möchtsch wüsse, wie’s isch, in ere Glygge Fasnacht z’mache? No stand yy und mach e unverbindligi Schnupperfasnacht bi de Sans Gêne Strizzi!
Alle Informationen in Schriftsprache findest du hier.
Wär sin mir Strizzi?
Mir Strizzi sin die Jungi Garde vo dr Fasnachtsgsellschaft Sans Gêne und sin 1932 gründet worde. Mir sin Maitli und Buebe im Alter vo 7 – 18 Joor und bi uns isch s ganzi Joor öbbis los. Ob Summerplausch, Glygge-Grimpeli, oder Niggi-Näggi – mir hän’s immer luschtig mitenand. Bsunders nadyrlig, wenn’s um d Fasnacht goht. Im Herbscht gömmer zämme uff’s Strizzi-Weekend, sueche s’Sujet us und sammle Idee für d’Goschdym und d’Laarve. Die duet denn unseri Sujetkommission umsetze. Mir hälfe drbyy und kaschiere unseri Laarve sälber! Vor dr Fasnacht hämmer Marschiebige und mache au am Laaferi mit.
S ganzi Joor iebe mir jewyyls am Donnschtig Oobe in unserem Iebigs- und Arbetskäller an dr Innere Margrethestrooss 15 und Nöchi Heuwoog. Mir sin also ganz aifach mit em ÖV erraichbar.
Was isch e Schnupperfasnacht bi de Strizzi?
D’Schnupperfasnacht bi de Strizzi git dir d’Mögligkait, ganz unverbindlig Fasnachtsluft in ere richtige Glygge z’schnuppere. Du dörfsch bi allem drbyy si: Ladäärne ypfyffe am Sunntig vor em Morgestraich, Cortège am Fasnachtsmäntig und -mittwuch und dr Bummel am 3. Bummelsunntig. Und je nach Zytpunggt vo dinere Aamäldig dörfsch nadyrlig au am Laaferi mit uns uff dr Bühni stoh, an unsere Marschiebige ystoh oder sogar am Niggi-Näggi drbyy si.
Nach dinere Schnupperfasnacht kasch du di denn entschaide, ob au du wottsch e Strizzi syy und Mitgliid in unserem Verein möchtsch wärde. Vellicht möchtsch afoh pfyffe oder drummle? Nadyrlig sin abr au Vorträbler härzlig willkomme! Und falls du doch lieber wiidr möchtsch als Zueschauer an d‘Fasnacht goh, isch das nadyrlig au ok. Mit dr Dailnahm als Schnupperfasnächtler verpflichtisch du di zue gar nüt!
Das isch drbyy im Schnupperfasnachtspäggli:
- d‘Laarve und s‘Goschdym fyr d‘Fasnacht (wenn dini Aamäldig nach em Aamäldeschluss für d‘Strizzi kunnt, git‘s e Leihgoschdym und sunsch s’Zugsgoschdym)
- d‘Verpfläägig während dr Fasnacht (Zmorge am Morgestraich, Zvieri und Znacht am Fasnachtsmääntig und -mittwuch)
- Betreuig duur erfahreni Zugsbeglaiter am Fasnachtsmääntig und -mittwuch
- dr Bummel – e ganzdäägige Usfluug inkl. Verpfläägig und Betreuig am 3. Bummelsunntig
- ab em Zytpunggt vo dinere Aamäldig bisch an unseri Aaläss yglaade
- …und nadyrlig ganz vyyl Spass mit uns Strizzi!
Koschte duet‘s ganze Schnupperfasnachtspäggli 180.- Frangge mit eme Zugsgoschdym und 100.- Frangge mit eme usglehnte Schnupperfasnachtsgoschdym.
Bi Frooge mäldisch di bi unserer Obfrau.
Yuko Maurer
obfrau.sg.strizzi@gmail.com
Aamäldeformular
