Mach mit!

Fascht 200 Aggtivi fyyre 100 Joor Fasnacht und sin Fyyr und Flamme!
D Fasnachtsgsellschaft Sans Gêne fyyrt im 2023 die 100. Fasnacht und isch immer no Fyyr und Flamme – ob Strizzi, Stamm oder Alti Garde: Zämme im Taggt simmer allewyyl!

STRIZZI (Jungi Garde)

D Strizzi sin die Jungi Garde vo dr Sans Gêne und sin 1932 gründet worde. Maitli und Buebe im Alter vo 7 – 18 Joor leere bi uns s’Pfyffe und s’Drummle. Bi de Strizzi isch s ganz Joor öbbis los: Summerplausch, Glygge-Grimpeli, Niggi-Näggi, Laarve kaschiere, Marschiebige oder Laaferi – mir hän’s immer luschtig mitenand! Bsunders am Strizzi-Wuchenänd im Herbscht, wo mr s Sujet ussueche und Idee für d Goschdym und d Laarve sammle.

S ganzi Joor iebe mir jewyyls am Donnschtig Oobe in unserem Iebigs- und Arbetskäller an dr Innere Margrethestrooss 15 und Nöchi Heuwoog. Mir sin also ganz aifach mit em ÖV erraichbar!

Gluschtet’s di au? Denn mach mit!

Offeni Iebigsstund:
Möchtsch ganz unverbindlig schnuppere und s’Pfyffe und s’Drummle usprobiere? Denn kum an unseri offeni Iebigsstund und mach mit!
Donnschtig, 20. April 2023, vom säggsi bis am siibeni (18.00 – 19.00h) in unserem Iebigskäller an dr Innere Margrethestrooss 15.

Alli wytere Informatione zue uns Strizzi findisch do: Strizzi

Bi Frooge mäldisch di bi unserer Obfrau.
Aline Bieri
obfrau.sg.strizzi@gmail.com

.

STAMM

Sin dini Kinder bi de Strizzi und du wottsch an de drey scheenschte Dääg nit nur am Stroosserand stoh? Denn mach mit! Kumm ko schnuppere und mach e Probefasnacht mit uns!
Pfyffer, Dambuur oder Vorträbler, Männli oder Wyybli spiilt kai Rolle – mir freye-n-ys uff di!

Unseri Iebigsstunde finde jewyyls am Donnschtig Oobe in unserem Iebigs- und Arbetskäller an dr Innere Margrethestrooss 15 statt. Näbscht em Iebe kunnt nadyrlig au s Gsellschaftlige nit z kurz. Und bi de Fasnachtsvorberaitige im aigene Arbetskäller dien mr zämme Laarve kaschiere, moole, uffbaue und hän’s gmietlig mitenand.

.

ALTI GARDE

Dini Kinder oder Grosskinder mache bi de Strizzi mit und di gluschtet’s au, e Dail vo dr Sans Gêne-Familie z syy? Denn mach mit! Au in dr Alte Garde sin männligi und wyybligi Pfyffer, Dambuure und Vorträbler härzlig willkomme! Kumm ko ineluege und stand bi-n-ere Probefasnacht yy!

In dr Alte Garde nämme mr’s e bitz gmietliger und hän’s ebefalls luschtig mitenand. Au bi uns kunnt näbe de Iebigsstunde s Gesellschaftlige nit z kurz. Mir iebe jewyyls am Mittwuch Oobe im Glyggekäller an dr Innere Margrethestrooss 15.

.

PASSIVI

Ganz eso aggtiv wottsch nit drby si und trotzdäm möchtsch e Dail vo dr Sans Gêne-Familie wärde? Denn mach mit und wird Passivmitgliid oder Strizzi-Gönner! Mir freye-n-ys über dini Unterstützig!