D Sans Gêne Strizzi zeige an de drei scheenschte Dääg jewyyls ihr aiges Sujet, wo sie am Weekend sälber usgschafft hän: S git e passends Goschdym, die sälber kaschierti Laarve und drzue e tolli Ladäärne. Eso gniesse d Strizzi d Fasnacht vom Ladäärne ypfyffe, über dr Morgestraich bis zum Cortège am Fasnachtsmäntig und -mittwuch. Immer derbyy sin unseri bewährte Begleiterinne und Begleiter, wo die ganzi Zyt drfür sorge, ass es de Strizzi guet goht und sie d Fasnacht könne gniesse. Dr Bummel am 3. Bummelsunntig isch denn dr definitivi Abschluss vom Fasnachtsjoor.
