Härzlig willkomme bi dr Fasnachtsgsellschaft Sans Gêne
In dr Sans Gêne Familie sin über 200 Aggtivi Füür und Flamme für d’Fasnacht und für d’Sans Gêne. Bi uns leere Maitli und Buebe ab dr 1. Klass s’Pfyffe und s’Drummle in unserer Junge Garde Sans Gêne Strizzi. Und wär no z’jung isch, zum es Inschtrumänt z’leere, ka bi unsere Luuszäpfe erschti Fasnachtsluft schnuppere. Unseri drei Seggtione verbindet d’Basler Fasnachtskultur und mir pflääge bewusst die lebändigi Tradition. Näbscht die Iebigsstunde kunnt nadyrlig au s’Gsellschaftlige nit z kurz. Und bi de Fasnachtsvorberaitige im aigene Arbetskäller dien mr zämme Laarve kaschiere, moole, uffbaue und hän’s gmietlig mitenand.
Strizzi
D’Strizzi sin die Jungi Garde vo dr Sans Gêne und sin 1932 gründet worde. Bi uns isch s’ganz Joor öbbis los und mir hän’s immer luschtig mitenand!
Stamm
D’Fasnachtsgsellschaft Sans Gêne isch e traditionsryychi Glygge, wo 1922 gründet worde-n-isch. Mir leege wärt uff s gsellschaftlige Zämmesyy und dien au bsunders bi de Fasnachtsvorbereitige sälber Hand aleege.
Alti Garde
Die Alti Garde vo dr Sans Gêne het as aigeni Seggtion 1982 dr Betriib ufgnoo. Au im höchere Alter pflääge mir d Gselligkeit, dien zämme musiziere und lache.
Mach mit!
Gluschtet’s di au, e Dail vo dr Sans Gêne Familie z syy? Mir freue uns über Zuewaggs bi allne Sektione und biete syt e paar Joor au e Pfyfferschuel für Erwaggseni aa.
Käller
Wottsch di Geburtsdaag oder e anders Fescht amene bsundere Ort fyyre, denn mach das doch in eim vo de beide Glyggekäller vo dr Sans Gêne.
Galerie
In unsere Fottialbe findsch e paar Impressione vo de letschte Joor.