Bereits vo 1897 bis 1905 hets e „Sans Gêne Club Basel“ gää, wo mit Muusig und Hochreeder aktiv an dr Basler Fasnacht mitgmacht het.
Am 28. Novämber 1922 isch duur e Dail vo de Mitgliider vo dr Fasnachtsgsellschaft „BFG“, wo im Herbscht 1922 uffglöst worde isch, die hüttigi Fasnachtsgsellschaft Sans Gêne gründet worde. Dr anderi Dail vo de ehemalige Mitgliider vo dr „BFG“ hett die „Alte Glaibasler AGB“ gründet.
1923 het d Sans Gêne iire erscht Ufftritt am Drummeli mit em „Appezäller“ gha. An dr Fasnacht 1923 het si mit em Sujet „Herren der Welt“ mitgmacht. S erschte Vereinslokal „Roth’s Weinstube zu Fischern“ isch am Fischmärt gsi.
D Noowuchsförderig isch scho immer e grosses Aaliige vo dr Sans Gêne gsi. So het im Joor 1930 e Buebiziigli am Cortège mitgmacht, wo ab 1931 unterem Name „Junge Sans Gêne“ Fasnacht gmacht het. D „Sans Gêne Strizzi“ in dr hüttige Form sinn 1932 gründet worde.
Die „erschti“ Alti Garde isch 1955 ins Lääbe gruefe worde. Leider het die noch Usenanderseitzige mit em Stamm und em kollektive Ussschluss vo allne Mitgliider bald wiider en Änd gfunde. Die Ussgschlossene hän am 29. August 1955 d „Muggedätscher“ gründet. Die hüttigi „Sans Gêne Alti Garde“ gits syt 1982.
Es hän immer wider Fraue bi dr Sans Gêne Fasnacht gmacht, aber eigentlich nur im Vordraab oder uff em Waage. D Beteiligung vo Fraue am offizielle Cliquelääbe isch syt dr Grindig immer wider e Problem gsi. 1975 isch d Junte „Sans Gêne Wybli“ gründet worde und 1992 hän d Fraue die volli Mitgliidschaft erhalte. 1995 hän dr Stamm und d Wybli fusioniert und schlussändlig wärde syt em Joor 2000 au in dr Alte Garde Fraue uffgnoo.
Dr Sans Gêne Gsellschaftskäller, eine vo de ältischte Basler Fasnachts- und Cliquekäller, befindet sich syt dr Eröffnig im Joor 1942 am Gärbergässli 30. Im Käller an dr Innere Margrethestrooss 15 wärde vor allem d Iebige abghalte und d Fasnachtsvorbereitige duuregfiert.
D Gsellschaft bezwäggt d Förderig und d Hochhaltig vo de baslerische Fasnachtstraditione und bestoot hütt us de Sektioone Stamm (90 Aggitvmitgliider), dr Alte Garde (40 Aggtivmitgliider) und dr Junge Garde mit eppe 60 Kinder und Jugendliche.
